Internasjonale Hawfvastestoet

Nog

En den is het zoe ver !!!!!

Preuf de sfeer

‘Mèt Hawfvaste trèkt in Mezeik neet allein
den Internationale Carnavalsstoet,
mer veere wieë ouch ein Hawfvastefieës !’






Eder jaor mèt Hawfvaste wuurt in het Vorstendom Mezeik het leech op greun gezat vuur den “Internationale Mezeiker Hawfvastestoet”. Den kónne de Vorst en de Groeëtridders van Het Heilig Wammes, Z.D.H. dePrins en de Jeugdprins weer einen triomftocht doeër de straote van de Mezeiker bènnestad make.

Woeëróm mèt Hawfvaste ?

We kalle hi-j uver ein ieëwen-aw tradi-jsie.
In ein ówttrèksel van “De Maeseyckenaer” ówt 1865 stuit de volgorde van den Hawfvastestoet van det jaor in Mezeik aafgedrök. Dao zeen echter dujdeleke aanwi-jzinge det al väöl ieërder dergeleke optochte plaats hawwe, mer sjrifteleke bewi-jze óntbrieëke hi-juver.
Daomèt is waal het bewi-js geleverd det den Hawfvastestoet van Mezeik den awtste Carnavalsstoet van Belsj is.
Den Hawfvaste, het “Laetare” (Verheug Uch), dae vreuger in Hollands Limburg ouch waerde geveerd, mer dao wegvieël tón nao de Hervorming väöl Katholi-jke fieëste waerde aafgesjaf, höbbe we in Mezeik behawte.

Mezi-jk, kleur, bewaeging en humor

Eder jaor opnóuw weer zeen der enorm väöl insjri-jvinge van groepe en wages. Het aantal deilnummers is echter beperk ómdet de bènnestad angers de stoet verkieërstechnisch neet aankan. Dit guuft de mögelekheid óm kwalitatief de lat erg hoeëg te lègge en ein zjus gedoseerde seleksie te make. Vuur de mezi-jk zörge ein aantal geweldige groeëte hermeni-je en muzi-jkkorpse mèt mazjorètte, aangevöld mèt tal van zaate hermeni-jkes di-j lètterlek en figuurlek vuur de plezeerige noeët zörge. De aw gevels van de Mezeiker bènnestad zörge der alti-jd vuur det de muzi-jk prachtig weerklinkt. Hoofdónderdeil vorme nateurlek de origineel wages en groepe di-j ofwaal vol kleur en bewaeging carnavaleske thema’ s ówtbeelde of di-j anderzijds inspuule op de aktualiteit. Ouch bi-j de eige Mezeiker deilname zit eder jaor weer väö originaliteit. Vuur de nudige lokale politieke satire en de nudigen humor zörge in de ieërste plaats tal van ‘Einzelgängers’.

De Maaseiker Prinse en de Raod van Ölf

Waat de wages van Prins en de Jeugdprins vuurstèlle is alti-jd ei good bewaard geheim in Mezeik. Eder jaor opnów wuurt vuur hun doeër de inwoeëners van de betreffende wijke einen einmalige Prinsewagen gebówd. Maonjelang wuurt dao mèt man en mach i-jverig gewirkt óm vuur hunne Prins eine prachtige praalwage te bówwe. Vuur de twieë Prinse bli-jf het tot Hawfvaste geheim wi-j hunne wage der ówt geit zeen. Pas op de lèste Vri-jdig en / of Zaoterdig vúúr Hawfvaste wuurt hae plechtig aan de Prinse uverhandigd.
De Raod van Ölf haeft einen unieke eige wage. Dae is besjilderd doeër eine Carnavalskunstenaer met hieël origineel karikature van de lede van de Raod van Ölf.

Kermelle, kermelle ...

Het kermelle goeëje is in Mezeik ei begrip. Eigelek stamt dit aaf van het leefdadigheidskarakter det de Mezeiker Hawfvastestoet in de vurige ieëuw kènde. Tón bestónge nog gein prinse-carnaval en sloeët de Maaseiker cavalcade mèt eine platte wage woeë op de gegoede börgers gifte en gave koste deponere, dae nao het fieës “aan den armen” waerde ówtgedeild.
De tónne slók di-j Prinse, groepe en de Raod van Ölf nów ówtströje zeen dao ein uverbli-jfsel van.